Лъэпкъ зэгурыIоныгъэмкIэ пшъэрылъхэр

Адыгэ Республикэм и Правительствэ зычIэт унэм семинар-зэIукIэу «2025-рэ илъэсым нэс Урысые Федерацием икъэралыгъо лъэпкъ политикэ ипхырыщынкIэ Урысыем ишъолъырхэм ягъэцэкIэкIо хэбзэ къулыкъухэм пшъэрылъэу яIэхэм яхьылIагъ» зыфиIорэр тыгъуасэ щыкIуагъ.

УФ-м и Президент и Полномочнэ лIыкIоу Къыблэ федеральнэ шъолъырым щыIэм игуадзэу Владимир Гурба Iофтхьабзэр зэрищагъ.

ЗэIукIэм хэлэжьагъэх УФ-м и Президент хэгъэгу кIоцI политикэмкIэ и ГъэIорышIапIэ ипащэ игуадзэу Анатолий Вылегжаниныр, Адыгеим и ЛIышъхьэу КъумпIыл Мурат.

Владимир Гурба зэIукIэр къызэIуихи, УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым ыцIэкIэ шIуфэс къарихыгъ.

«Непэ тиеплъыкIэхэмкIэ тызэхъожьызэ, экспертхэм яеплъыкIэхэри зэдгъашIэзэ, Iофхэм язытет джыри зэ уасэ фэтшIынэу сэгугъэ. ТызытегущыIэщт IофыгъохэмкIэ хэкIыпIэ зэфэшъхьафхэр ащ къытигъэлъэгъунэу, ищыкIэгъэ унашъохэм яштэнкIэ амалхэр къытынэу къысщэхъу», — къыIуагъ УФ-м и Президент и Полномочнэ лIыкIоу ЮФО-м щыIэм игуадзэ.

ЗэIукIэм хэлажьэхэрэм шIуфэс къарихи, КъумпIыл Мурат агу къыгъэкIыжьыгъ лъэпкъ, дин зэгурыIоныгъэм игъэпытэн тегъэпсыхьэгъэ пшъэрылъхэу Урысыем игъэпытэнкIэ мэхьанэшхо зиIэхэу Президентэу Владимир Путиным къыгъэуцугъэхэр.

«Этнополитикэ Iофхэр зыпкъ итынхэ зэрэфаемкIэ Адыгеир щысэтехыпIэу щыт. Республикэм ис лъэпкъхэр зэкIэ Адыгеими, Урысыеми къарыкIощтым егъэгумэкIых, лъэпкъхэм азыфагу зыкIыныгъэу илъыр гъэпытэгъэн зэрэфаем дырагъаштэ, тиотраслэ шъхьаIэхэм хэхъоныгъэ ягъэшIыгъэным яIахьышIу хашIыхьэ, хэушъхьафыкIыгъэ дзэ операцием хэлажьэхэрэм агу къаIэты», — къыIуагъ АР-м и ЛIышъхьэ.

Адыгеим щыпсэурэ лъэпкъ зэфэшъхьафхэм къахэкIыгъэхэр хэушъхьафыкIыгъэ дзэ операцием зэрэхэлажьэхэрэр, ахэм ащыщыбэм тын лъапIэхэр къазэрафагъэшъошагъэр республикэм ипащэ къыхигъэщыгъ. Лъэпкъ зэгурыIоныгъэр Адыгеим щыгъэпытэгъэнымкIэ Iофтхьабзэу зэрахьэхэрэм, Урысыем икъэралыгъо лъэпкъ политикэ и Стратегие ипшъэрылъхэм ар зэрадиштэрэм ягугъу къышIыгъ.

Семинар-зэIукIэм Урысыем икъэралыгъо лъэпкъ политикэ ипхырыщынкIэ зигъо Iофыгъохэм щатегущыIагъэх, 2023-рэ илъэсымкIэ Iофэу ашIагъэр щызэфахьысыжьыгъ, 2024-рэ илъэсымкIэ пшъэрылъхэр щагъэнэфагъэх, IэкIыб къэралыгъохэм къарыкIыгъэхэу Къыблэ федеральнэ шъолъырым щыпсэухэрэр социальнэ, культурэ лъэныкъомкIэ щыIэныгъэм хэгъэгъозэгъэнхэм япхыгъэ Iофыгъохэм щахэплъагъэх, лъэпкъ джэгъогъуныгъэ ныбжьыкIэхэм азыфагу къимытэджэнымкIэ амалэу зэрахьэхэрэм атегущыIагъэх. Шъолъырхэм ялIыкIохэм экстремизмэм пэуцужьыгъэнымкIэ, къулыкъухэм язэдэлэжьэныгъэ гъэпытэгъэнымкIэ, украинскэ национализмэмрэ неонацизмэмрэ ябэныжьыгъэнымкIэ, тарихъыр зытетым димыштэу къагъэлъэгъонэу зэрэпылъхэм пэуцужьыгъэнымкIэ IофшIагъэу яIэхэр къызэфаIотагъэх.