IофшIэгъу дэкIыгъу

АР-м и ЛIышъхьэу КъумпIыл Мурат тыгъуасэ Тэхъутэмыкъое районым щыIагъ. социальнэ мэхьанэ зиIэ псэолъэ заулэмэ яшIын зэрэкIорэр ыуплъэкIугъ, промышленнэ паркэу «Инэм» псэолъэшIыныр зэрэщыкIорэр зэригъэлъэгъугъ.

АР-м и ЛIышъхьэ къызэрэхигъэщыгъэмкIэ, Тэхъутэмыкъое районыр зызэхащагъэр илъэси 100 зэрэхъурэр Iоныгъом хагъэунэфыкIыщт ыкIи ащ ехъулIэу проект ин заулэ гъэцэкIагъэ хъущт: охътэ благъэхэм еджэпIакIэ, IэзэпIакIэ районым къитэджэщтых, псауныгъэр зыщагъэпытэн алъэкIыщт модульнэ комплексэу республикэмкIэ апэрэу щытыщтым ишIын рагъэжьагъ. УФ-м и Президентэу Владимир Путиным къыгъэуцугъэ пшъэрылъхэм ягъэцэкIэн тегъэпсыхьагъэу, федеральнэ гупчэм иIэпыIэгъу хэлъэу а Iофтхьабзэхэр зэкIэ зэшIуахых.

Адыгеим и ЛIышъхьэ псэолъэшIыпIэхэм ащыIагъ, Iофэу ашIэрэм уасэ фишIыгъ. Мы илъэсым Iоныгъом къыщегъэжьагъэу къуаджэу АдыгеякIэмрэ псэупIэу Яблоновскэмрэ ащагъэпсыгъэ еджапIэхэм ачIэхьажьыщтых. Джыри зы еджапIэ мы илъэсым псэупIэу Яблоновскэм щатIупщыщт. НэмыкIэу къэпIон хъумэ, Тэхъутэмыкъое районым нэбгырэ 3550-рэ зычIэфэщт еджэпIакIэхэр иIэ хъущтых.

Муниципальнэ образованиеу «Тэхъутэмыкъое районым» ипащэу Шъао Аскэр IофшIэнхэр зэрэкIохэрэм фэгъэхьыгъэу ЛIышъхьэм къыфиIотагъ. ШэпхъэшIухэм адиштэрэ псэолъапхъэхэр агъэфедэхэзэ джырэ лъэхъаным ипроектхэм атетэу еджэпIакIэхэр зэкIэ ашIыгъэх. ЕджапIэм гъэсэныгъэ Iофыр икъоу щызэхэщэгъэным пае ищыкIагъэр зэкIэ къыдалъытагъ. Актовэ залыр, спортым зыщыпылъыщтхэ ыкIи тренажернэ залхэр, шхапIэр, медицинэ Iофтхьабзэхэр зыщызэшIуахыщтхэ унэр ыкIи нэмыкIхэр хэтых. АР-м и ЛIышъхьэ пшъэрылъ афишIыгъ ящыкIэгъэ Iэмэ-псымэхэмкIэ еджапIэхэр зэтырагъэпсыхьанхэу, ащ къыпэIулъ чIыпIэхэм чъыгхэр, къэгъагъэхэр ащагъэтIысхьанхэу ыкIи нахь теплъэ дахэ яIэу ашIынхэу.

ХэушъхьафыкIыгъэу зытегущыIагъэхэм ащыщых еджапIэм Iоф щызышIэщтхэм ягъэхьазырын. АР-м и ЛIышъхьэ игъоу афилъэгъугъ гъэсэныгъэ зыщарагъэгъотырэ организациехэм яIофшIэнкIэ апшъэрэ еджапIэхэм, республикэ естественнэ-хьисап еджапIэм, «Полярис — Адыгея» зыфиIорэм икъутамэхэм зэдэлэжьэныгъэ адыряIэнэу, республикэм гъэсэныгъэмкIэ иинфраструктурэ иамалхэр зэкIэ зэрищыкIагъэм тетэу агъэфедэнхэу, сэнаущыгъэ зыхэлъ кIэлэцIыкIухэр къыхэгъэщыгъэнхэм ыкIи ахэм IэпыIэгъу ятыгъэным атегъэпсыхьэгъэ Iофтхьабзэхэр зэшIуахынхэу.

«Къэралыгъо программэхэр амал зэриIэкIэ нахь шIогъэ ин хэлъэу гъэфедэгъэнхэм, федеральнэ пащэхэм къытатырэ IэпыIэгъур нахь икъоу зищыкIагъэхэм анэдгъэсыным, гъэсэныгъэм иинфраструктурэ дгъэкIэжьыным, кIэлэцIыкIухэм яегъэджэнкIэ амал дэгъухэр щыIэнхэм, шIэныгъэ куу яIэу пIуныгъэ тэрэз зэрагъэгъотыгъэ цIыфхэу ахэр хъунхэм ыуж тит. УФ-м и Президентэу Владимир Путиным къыгъэуцугъэ пшъэрылъ анахь шъхьаIэхэм ар зыкIэ ащыщ», — къыхигъэщыгъ КъумпIыл Мурат.

Джащ фэдэу анахь мэхьанэшхо зиIэ ыкIи зигъо Iофыгъохэм ащыщ а чIыпIэм щыпсэухэрэм ащыщыбэм зыкъызэрэфагъэзагъэр: спорт инфраструктурэм хэхъоныгъэ егъэшIыгъэныр. Мы илъэсым ыкIэхэм адэжь псэупIэу Яблоновскэм республикэмкIэ апэрэу модульнэ физкультурэ комплекс щагъэпсынэу рахъухьагъ, ащ нэмыкIэу стадионым псауныгъэм икъэухъумэн фытегъэпсыхьэгъэщт гупчэшхо щашIыщт. Федеральнэ программэу «Спортыр —щыIэныгъэм ишапхъ» зыфиIорэм, лъэпкъ проектэу «Демографием» ипроектэу «Бизнес-спринтым» атегъэпсыхьагъэу ахэр ашIыщтых. НепэкIэ спорт еджапIэу N 3-м тегъэкIагъэр нахь макIэ хъунымкIэ кIэу ашIыщт спорт псэолъитIумэ яшIогъэшхо къэкIощт. Зыщагъэсэным имызакъоу, зэнэкъокъу зэфэшъхьафхэр щызэхащэнхэмкIи ахэр къызфагъэфедэщтых.

Районым ипащэхэм ыкIи подряднэ организациехэм гущыIэгъу зафэхъум, республикэм и ЛIышъхьэ къыхигъэщыгъ районым ипсэупIэхэм гуIэтыпIэ чIыпIэхэр ащызэхэщэгъэнхэм епхыгъэ IофшIэныр лъыгъэкIотэгъэным мэхьанэшхо зэриIэр. Мыщ дэжьым цIыфхэм яеплъыкIэ къыпкъырыкIынхэ ыкIи зэгъусэхэу зигъо Iофыгъохэр зэшIуахынхэ фае.