Республикэм иэкономикэкIэ мэхьанэшхо яI

АР-м и ЛIышъхьэу КъумпIыл Мурат промышленнэ паркэу «Инэм» зыфиIорэр зыщагъэпсырэ чIыпIэм щыIагъ. Ащ игъусагъэх министрэхэм я Кабинет и Тхьаматэу КIэрэщэ Анзаур, муниципальнэ образованиеу «Тэхъутэмыкъое районым» ипащэу Шъэо Аскэр, АР-м икъэралыгъо бюджет учреждениеу «Стройзаказчикым» ипащэ ипшъэрылъхэр зыгъэцэкIэрэ Хьаджымэ Аслъан.

Тэхъутэмыкъое районым, псэупIэу Инэм пэмычыжьэу, промышленнэ паркым пае чIыгу гектар 200 фэдиз къыщыхагъэкIыгъ. Нэужым паркым чIыпIэу ыубытырэм нахь зырагъэушъомбгъун алъэкIыщт. Мы лъэхъаным инфраструктурэу ящыкIэгъэщтым епхыгъэ IофшIэнхэр зэшIуахых: гъогухэр ашIых, электричествэ рыкIуапIэхэр агъэпсых, укъэбзалъэхэр, административнэ унэхэр агъэуцух ыкIи нэмыкIхэр.

АР-м и ЛIышъхьэ гъогу картэм дэмыхынхэу пшъэрылъ афишIыгъ. ПIэлъэ гъэнэфагъэхэм рахъухьэгъэ инфраструктурэр агъэпсынэу, мы Iофым къыхэлэжьэнэу щытхэм япхыгъэ IофшIэнри нахь агъэчанынэу афигъэпытагъ.

Промышленнэ паркым иапэрэ инвесторхэм ахэхьан ылъэкIыщт маркетплейсэу Ozon. Джащ фэдэу гофроупаковкэм икъыдэгъэкIынкIэ, трубэхэм, фитингхэм, медицинэ пкъыгъо зэфэшъхьафхэм, тэрэзэу цIыфхэр гъэшхэгъэнхэм пае ящыкIэгъэщт гъомылапхъэхэр ыкIи нэмыкIхэр къэзыгъэхьазырыщтхэ компаниехэри фаех «Инэмым» чIыпIэ щагъотынэу. ЗэрэгугъэхэрэмкIэ, хъызмэтыр зезыхьан зылъэкIыщт псэолъэ 50 фэдиз а чIыпIэм итыщт, инвестициехэр сомэ миллиард 65-м шIокIыщтых. Ащ нэмыкIэу промышленнэ паркым амал къытыщт IофшIэпIэ чIыпIакIэу мини 10 фэдиз щыIэ хъунымкIэ. 2025-рэ илъэсым ар атIупщынэу мэгугъэх. Паркым иIофхэм ягъэзекIон фэгъэзэгъэщтыр Iахьзэхэлъ обществэу «Адыгэ Республикэм ихэхъоныгъэкIэ корпорациер» зыфиIорэр ары.

КъумпIыл Мурат Тэхъутэмыкъое районэу чанэу хэхъоныгъэ зышIырэм иинфраструктурэ нахь зэтегъэпсыхьэгъэнымкIэ Iофэу агъэцакIэрэм мэхьанэшхо зэриIэр къыхигъэщыгъ. Нафэу зэрэщытымкIэ, ащ щыпсэухэрэм япчъагъэ хэпшIыкIэу нахьыбэ мэхъу. Гъогухэм ягъэцэкIэжьынкIэ ыкIи коммунальнэ хъытыухэр уахътэм диштэу шIыгъэнхэмкIэ республикэм ихэбзэ къулыкъухэм ащ дакIоу пшъэрылъыбэ зэшIуахы. ГущыIэм пае, илъэсэу икIыгъэм АдыгеякIэм укъэбзалъэхэр щыгъэцэкIэжьыгъэнхэмкIэ Iофышхо щагъэцэкIагъ. АР-м и ЛIышъхьэ Iофэу зэшIуахыгъэхэм защигъэгъозагъ.