Хэхъоныгъэм ипроектыкI

Урысые Федерацием экономикэ хэхъоныгъэмкIэ иминистрэу Максим Решетниковым тхьамэтагъор зыщызэрихьэгъэ зэIукIэм пэIудзыгъэ шIыкIэм тетэу хэлэжьагъ Адыгеим и ЛIышъхьэу КъумпIыл Мурат.

ЗытегущыIэнхэм ащыщыгъэх шъолъыр­хэм ясоциальнэ-экономикэ хэхъоныгъэ иунэе программэхэр пхырыщыгъэнхэр, 2030-рэ илъэсым нэс къызэлъызыубытырэ унэе программакIэхэр ухэсыгъэнхэр.

ЗэIукIэр къызэIуихызэ Максим Решетниковым къызэрэхигъэщыгъэмкIэ, Урысыем и Президент а IофшIэныр зэрэкIорэм ынаIэ тырегъэты. УФ-м экономикэ хэхъоныгъэмкIэ иминистрэ къызэриIуагъэмкIэ, унэе программэхэр пхырыщыгъэнхэмкIэ хэгъэгум гъэхъэгъэ гъэнэфагъэхэр щашIыгъэх, пэрыт шIыкIэ-амалхэри щыIэх. Ащ дакIоу программэм иамалхэр къэралыгъо программэхэмрэ лъэпкъ проектхэмрэ зэшIохыгъэн­хэмкIэ Iофтхьабзэу зэрахьащтхэм ади­штэнхэ фае. АР-м хэхъоныгъэмкIэ унэе программэр 2024-рэ илъэсым нэс зэригъэцэкIагъэм осэшIу къыфашIыгъ. КъызэрэхагъэщыгъэмкIэ, мы программэм иамалхэр шIуагъэ къытэу Адыгеим ыгъэ­федэнхэ ылъэ­кIыгъ. Джыри зы мэхьанэ зиIэ лъэныкъо къыхагъэ­щыгъ: демографием ылъэныкъокIи Iофхэм язытет уигъэрэзэнэу щыт.

АР-м и ЛIышъхьэ зэIукIэм къыщыгущыIэзэ къызэриIуагъэмкIэ, Владимир Путиным унашъоу ышIыгъэм ишIуагъэкIэ Адыгеим илъэситфыкIэ узэкIэIэбэжьымэ IэпыIэгъум джыри нахь зегъэушъомбгъугъэ­ным иамал иIэ хъугъэ, хэхъоныгъэм иунэе программэ хэлажьэу ригъэжьагъ. А программэм республикэм иэкономикэ ихэхъо­ныгъэкIэ мэхьанэшхо иIагъ, Адыгеим социальнэ лъэныкъомкIи, иинфраструктурэ изэтегъэпсыхьанкIи ишIогъэшхо къэкIуагъ. А программэм сомэ миллиарди 5,1-рэ пэIухьагъ. БэшIагъэу зэтырихьэгъэ ыкIи анахь зыгъэ­гу­мэкIырэ Iофыгъохэу социальнэ лъэныкъохэмкIэ щыIэхэм а ахъщэр апэIуагъэхьагъ: псауныгъэм икъэухъу­мэнкIэ, культурэмкIэ, спортымкIэ учреждениехэр зыпкъ рагъэуцожьыгъэх, сабыибэ зэрыс унагъохэм къа­фыхагъэкIыгъэ чIыгу Iахьхэм инфраструктурэр аращэлIагъ. Ащ нэмыкIэу программэм къыдилъытэрэ сомэ миллиарди 2,4-р промышленнэ паркы­шхоу «Инэм» зыфиIоу ашIырэм иинфраструктурэ пэIуагъэхьагъ.

Программэм къыдилъытэрэ ахъщэм щыщ газгощыпIэ станцием изэтегъэпсыхьан, къушъхьэлъэ чIыпIэхэм автомобиль гъогухэр ащыгъэ­цэкIэжьыгъэнхэм, къалэу Мыекъуа­пэкIэ псыхъоу Шъхьэгуащэ инэпкъхэм ягъэпытэн апэIуагъэхьагъ.

Программэм ишIуагъэкIэ бизнес цIыкIум­рэ гурытымрэ IэпыIэгъу аратыгъ, мэкъу­мэщ техникэр къащэфыным пае мэкъу­мэщ товархэр къэзышIыхэрэм ахъщэу агъэкIодыгъэр къафалъэгъу­жьыгъ, ахэм къахэкIэу инвестицие сомэ мил­лион 360-рэ Iофтхьабзэхэм апэIуагъэхьан алъэкIыгъ.

АР-м и ЛIышъхьэ къызэриIуагъэмкIэ, хэхъоныгъэмкIэ унэе программэм рес­публикэр зэрэхэлажьэрэм ишIуагъэкIэ гъэхъэгъэ гъэнэфагъэхэр ашIынхэ алъэ­кIыгъ: зэхэубытэгъэ продукциеу къахьы­жьырэм, цIыфхэм гурытымкIэ яхахъохэм, бюджетым къыхимыубытэрэ инвестициехэм ыкIи нэмыкIхэм нахь ахэхъуагъ, IофшIэнмыгъотыныгъэм къыкIичыгъ. ЩыIэныгъэм къыгъэлъэгъуагъ программэм шIуагъэу къытырэр. Президентым унашъоу ышIыгъэм ишIуагъэкIэ Адыгеим а программэм хэлэжьэн мурад джыри иI.

АР-м и ЛIышъхьэ Адыгэ Республикэм ихэхъоныгъэкIэ унэе программакIэм ипроект зэIукIэм хэлажьэхэрэр щигъэгъозагъэх. А проектыр 2025 – 2030-рэ илъэсхэм ателъытагъ, федеральнэ бюджетым щыщэу сомэ миллиарди 6 Iоф­тхьабзэхэм апэIухьащт.