ШIухьафтынхэр афагъэхьазырыгъэх

Хабзэ зэрэхъугъэу, Iофтхьабзэу «А 1-рэ классым кIорэм пае шIухьафтын» зыфиIорэм къыдыхэлъытагъэу Адыгеим Iоныгъом и 1-м ехъулIэу еджэнымкIэ къызфагъэфедэщт пкъыгъо зэфэшъхьафыбэ зыдэлъ Iалъмэкъ мини 6,7-рэ агъэхьазырыгъ.

2017-рэ илъэсым къыщыублагъэу къызытырагъэзэжьыгъэ Iофтхьабзэм Адыгеим и ЛIышъхьэу КъумпIыл Мурат чанэу хэлажьэ. Мы аужырэ илъэситIум ащ фэдэ шIухьафтынхэр аратых Херсон хэкум и Геническэ район ис кIэлэцIыкIухэу апэрэ классым кIохэрэми. Мы илъэсым районым ис кIэлэцIыкIухэм ащ фэдэ шIухьафтын 700 аратыщт Адыгеим ихъызмэтшIэпIэ пэрытхэм ащыщэу «Картонтарэмрэ» компаниеу SFT Group зыфиIорэмрэ ягъусэхэу.

«Апэрэу еджапIэм зикIэлэцIыкIухэр кIощт унагъохэми а Iофтхьабзэр игъоу зэралъытэрэр тинэрылъэгъу. Iоныгъом и 1-м ехъулIэу ныхэмрэ тыхэмрэ кIэлэцIыкIухэм апае мылъкоу агъэкIодырэм тIэкIу нэмыIэми нахь къыкIичынымкIэ ащ ишIуагъэ къэкIощт, ежь кIэлэцIыкIу¬хэри ыгъэгушIощтых», — къыIуагъ КъумпIыл Мурат.

ШIэныгъэм и Мафэ ехъулIэу Адыгеимрэ Геническэ районымрэ якIэлэцIыкIухэу а 1-рэ классым кIощтхэм еджэнымкIэ къызфагъэфедэщт пкъыгъо 20-м ехъу зыдэлъ IалъмэкъыкIэхэр аратыщтых. Ахэм ахэхьэх тетрадьхэр, ручкэхэр, къэлэмхэр, сурэт зыдашIыхьащт альбомхэр, шъо зэфэшъхьаф зиIэ тхылъыпIэхэр ыкIи нэмыкIыбэхэр.

«Си Адыгей» зыфиIорэ тхылъым кIэлэеджакIохэм республикэм, ащ икультурэ ыкIи итарихъ афэгъэхьыгъэ къэбарыбэу ежьхэмкIэ федэ хъущтыр рагъотэщт. Урысыемрэ Адыгеимрэ якъэралыгъо тамыгъэ шъхьаIэхэм – гербымрэ быракъымрэ афэгъэхьыгъэр ежьхэмкIэ анахь мэхьанэшхо зиIэщт дневникым иапэрэ нэкIубгъохэм арагъотэщт.

ЗэкIэ кIэлэцIыкIухэм апае агъэхьазырыгъэ Iалъмэкъхэм ыкIи ныбалъэу аратыщтхэм къэнэфырэ пкъыгъохэр атедагъэх. Адыгэ Республикэм гъэсэныгъэмрэ шIэныгъэмрэкIэ и Министерствэ фэгъэзагъ шIухьафтын 6000-р Адыгеим имуниципалитетхэм атегощэгъэным.