«Мэздахэм» изэтегъэпсыхьан лъэкIуатэ

Адыгеим и ЛIышъхьэу КъумпIыл Мурат «Мэздахэм» къыпэIулъ чIыпIэр нахь зэрэзэтырагъэпсыхьэрэм зыщигъэгъозагъ. Ащ игъусагъэх АР-м иминистрэхэм я Кабинет и Тхьаматэу КIэрэщэ Анзаур, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ, Мыекъуапэ иадминистрацие, IофшIэнхэр зэшIозыхырэ фирмэм ялIыкIохэр.

Шъугу къэтэгъэкIыжьы Нэгыежъ Iуашъхьэм ичапэ тет «Мэздахэм» къыпэIулъ мэз шъолъырыр республикэм Фондэу «Дом. РФ» зыфиIорэм дишIыгъэ зэзэгъыныгъэм диштэу зэрэзэтырагъэпсыхьэрэр. Паркым пстэумкIи гектар 435-рэ зэлъеубыты. Къэлэ щыIэкIэ Iэрыфэгъум тегъэпсыхьэгъэ проект анахь дэгъухэм я Урысые зэнэкъокъоу лъэпкъ проектэу «ПсэупIэмрэ къэлэ щыIакIэмрэ» зыфиIорэм диштэу зэхащэрэм мы проектыр щатекIуагъ.

Апэрэ чэзыоу архитектурэмкIэ IофшIэн заулэ агъэцэкIэнэу рахъухьэ. 2024-рэ илъэсыр имыкIызэ гектари 7,7-рэ зэтырагъэпсыхьан фаеу щыт. ЫпэкIэ агъэкIэжьыгъэгъэ дэкIояпIэм зыплъыхьапIэ щашIыгъ, лъэс гъогухэм, кушъхьэфэчъэ гъогухэм ягъэпсын ыкIэм фэкIо, пхъэнтIэкIухэм, хэкIилъхьапIэхэм ягъэуцун, транспорт уцупIэхэм язэтегъэпсыхьан Iоф адашIэ. Джащ фэдэу зыгъэпсэфыпIэ чIыпIэхэр, хъэренэхэр, кIэлэцIыкIу, спорт джэгупIэхэр мыщ щызэтырагъэпсыхьанэу рахъухьэ. МыщкIэ анахьэу анаIэ зытырагъэтыщтыр тыкъэзыуцухьэхэрэ дунаим изытет зэщымыгъэкъогъэныр ары.

Шъугу къэтэгъэкIыжьы проектым джыри федеральнэ IэпыIэгъу зэригъотыщтыр. АщкIэ зишIуагъэ къэкIуагъэр къэлэ цIыкIухэмрэ тарихъ мэхьанэ зиIэ псэупIэхэмрэ атегъэпсыхьэгъэ проект анахь дэгъухэм я Урысые зэнэкъокъу Мыекъуапэ джыри зэращытекIуагъэр ары.

«Мы чIыпIэ дахэр Мыекъуапэ ианахь лъэгъупхъэ чIыпIэ хъуным мэхьанэшхо етэты. АщкIэ бэ зэшIотхыгъэр: «Мэздахэм» екIурэ дэкIояпIэр дгъэкIэжьыгъ, ащ къыпэIулъ чIыпIэр зэтедгъэпсыхьагъ, ежь мэз шъолъырми зэхъокIыныгъэшхохэр фэтшIэу едгъэжьагъ. Джыдэдэм чIыопсым икъэухъумэнкIэ хэбзэгъэуцугъэм щыгъэнэфэгъэ шапхъэхэр къыдэтлъытэзэ Iоф тшIэн, гъогу картэмкIэ тылъыкIотэн фае», — къыIуагъ КъумпIыл Мурат.

Республикэм и ЛIышъхьэ ыпэкIэ пшъэрылъэу афишIыгъагъэхэр зэрагъэцэкIагъэр ыуплъэкIугъ. Мыекъуапэ имэрие ипащэ Нэгыежъ Iуашъхьэм къыпэIулъ чIыпIэм щыщэу зэтырагъэпсыхьагъэр къэбзэнымкIэ амалэу зэрахьэхэрэр къыIотагъ. Арт-псэуалъэхэу агъэпсыхэрэр, тарихъ чIыпIэхэмрэ лъэгъупхъэ чIыпIэхэмрэ якIурэ лъэс гъогууанэхэр къыдалъытэхэзэ, Мыекъуапэ зекIомкIэ кодыр щыгъэфедэгъэным мэхьанэшхо зэриIэр КъумпIыл Мурат къыхигъэщыгъ.