Советым изэхэсыгъу

УФ-м и Президент и Полномочнэ лIыкIоу Къыблэ федеральнэ шъолъырым щыIэм дэжь щызэхэщэгъэ Советым зэхэсыгъоу иIагъэр Владимир Устиновым зэрищагъ. Ащ хэлэжьагъ Адыгеим и ЛIышъхьэу КъумпIыл Мурат.

Видеоконференцие шIыкIэм тетэу кIогъэ Iофтхьабзэм Адыгеим ыцIэкIэ джыри хэлэжьагъэх федеральнэ инспектор шъхьаIэу Сергей Дрокиныр, министрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, экономикэ хэхъоныгъэмрэ сатыумрэкIэ министрэу Шэуджэн Заур.

Бизнесым Къыблэ федеральнэ шъолъырым зыщегъэушъомбгъугъэным, капитал шъхьаIэм нахьыбэу инвестициехэр къыхалъхьанхэм япхыгъэ Iофыгъохэм мыщ щахэплъагъэх. Ипэублэ псалъэ Владимир Устиновым предпринимательствэм зегъэушъомбгъугъэным, инвестициехэр нахьыбэу къахалъхьанхэм мэхьанэшхо зэряIэр къыщыхигъэщыгъ.

«Урысые Федерацием и Президент и Указэу Урысыем хэхъоныгъэ егъэшIыгъэным ехьылIагъэм щыгъэнэфагъ 2020-рэ илъэсым егъэпшагъэмэ, капитал шъхьаIэм инвестициеу халъхьэрэм 2030-рэ илъэсым нэс процент 60-кIэ зыкъегъэIэтыгъэнэу. Непэ санкциехэр зыщагъэфедэрэ лъэхъаным инвестиционнэ IофшIэным апшъэрэ мэхьанэ етыгъэн фае. Лъэныкъо пстэури къыдалъытэзэ, инвесторхэм зэдэлэжьэныгъэ дэгъу шъолъырхэм щадызэхащэн, административнэ пэрыохъухэр дагъэзыжьынхэ, инвестиционнэ проектхэм ягъэцэкIэнкIэ инфраструктурэм зырагъэушъомбгъун фае», — къыIуагъ Владимир Устиновым.

УФ-м и Президент и Полномочнэ лIыкIоу зэхэсыгъом къызэрэщыхигъэщыгъэмкIэ, 2023-рэ илъэсым Къыблэ федеральнэ шъолъырым инвестициехэр дэгъоу къыхалъхьагъэх, сомэ триллиони 2,3-рэ — экономикэм.

Джащ фэдэу Владимир Устиновым бизнесым хэхъоныгъэ егъэшIыгъэнымкIэ амалэу зэрахьэхэрэми ягугъу къышIыгъ. ГущыIэм пае, инвесторхэм ямылъку нахьыбэу къахалъхьанымкIэ шIыкIакIэхэр Къыблэ федеральнэ шъолъырым къыщагъотых, предпринимательхэм яфитыныгъэхэр къэухъумэгъэнхэм тегъэпсыхьэгъэ правовой актхэр аштэх.

Владимир Устиновым шъолъырхэм пшъэрылъ афишIыгъ инвестициехэр капитал шъхьаIэм нахьыбэу халъхьанхэмкIэ Iофэу ашIэрэр нахь агъэлъэшынэу. Предпринимательхэм яфитыныгъэхэм якъэухъумэнкIи пшъэрылъ заулэ зэхэсыгъом щафашIыгъ. Джащ фэдэу шъолъырхэм яхэбзэ къулыкъухэм яIофшIэн зэрэзэхащэрэми мыщ щытегущыIагъэх. В. Устиновым зэрэхигъэунэфыкIыгъэмкIэ, Лъэпкъ рейтингым къыщэлъагъо шъолъырхэм яхэбзэ къулыкъухэм яIофшIэн зэрэзэхащэрэр.

Шъугу къэтэгъэкIыжьы 2023-рэ илъэсым икIэуххэмкIэ Лъэпкъ рейтингыр стратегическэ гукъэкIхэмкIэ Агентствэм Петербург щыкIогъэ я XXVII-рэ Дунэе экономическэ форумым къазэращыхилъхьэгъагъэр. Адыгеир рейтингым щылъыкIотагъ, хэгъэгум ишъолъырхэмкIэ я 14-рэ чIыпIэр аубытыгъ. 2023-рэ илъэсым икIэуххэм атетэу сомэ миллиард 61,6-рэ хъурэ инвестициехэр Адыгеим къыхалъхьагъэх. 2024-рэ илъэсым иапэрэ кIэлъэныкъо капитал шъхьаIэм сомэ миллиард 28,5-рэ хъурэ инвестициехэр халъхьагъэх. 2023-рэ илъэсым джащ фэдэ илъэхъан егъэпшагъэмэ, ар проценти 171,9-рэ мэхъу. Сомэ миллиард 82,2-рэ хъурэ инвестициехэр зыпэIухьащт проект 34-мэ непэ Iоф адашIэ. Анахь шъхьаIэу щытхэр зыгъэпсэфыпIэу «Лэгъонакъэрэ» Тэхъутэмыкъое районым щагъэпсыщт промышленнэ паркымрэ япроектхэр ары.

Республикэ инвестиционнэ шапхъэхэр гъэхъагъэ хэлъэу зэрагъэфедэхэрэм ишIуагъэкIэ инвестициехэр нахьыбэу Адыгеим къыхалъхьэхэ хъугъэ. Джащ фэдэу инвестиционнэ проектхэм ягъэцэкIэнкIэ ищыкIэгъэ инфраструктурэр Адыгеим щагъэпсы, хэбзэIахьхэмкIэ фэгъэкIотэныгъэхэр инвесторхэм афашIых.

«Опытэу тиIэр къызфэдгъэфедэзэ, Президентэу Владимир Путиным къыгъэнэфэгъэ пшъэрылъхэр дгъэцакIэхэзэ, республикэм нахьыбэу инвестициехэр къыхалъхьаным ыуж титыщт. Инвестиционнэ проект пэпчъ зы чIыпIэм щагъэхьазыры, ахэмкIэ зэрэзэдырагъэштэн фэе пIалъэхэр амал зэриIэкIэ агъэкIэкIыгъэх, фэгъэкIотэныгъэ заули ахэм яI. ИщыкIэгъэ инфраструктурэр тэгъэпсы. А пстэури экономикэм зыкъегъэIэтыгъэным, республикэм хэхъоныгъэ егъэшIыгъэным афэIорышIэщт. IофшIэпIэ чIыпIакIэхэр зэхэщагъэ хъущтых, цIыфхэм яхахъо зыкъиIэтыщт, социальнэ пшъэрылъхэм язэшIохынкIэ бюджетхэм хэбзэIахьэу къарыхьэрэм къыхэхъощт», — къыIуагъ КъумпIыл Мурат.