Щагухэм язэтегъэпсыхьан

Адыгеим и ЛIышъхьэу КъумпIыл Мурат федеральнэ проектэу «Къэлэ щыIэкIэ Iэрыфэгъу» зыфиIорэм диштэу Мыекъуапэ мыгъэ щызэтырагъэпсыхьэгъэ щагухэм язытет зэригъэлъэгъугъ. Ащ игъусагъэх АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ иминистрэ иапэрэ гуадзэу Лафышъэ Рэмэзан, Мыекъуапэ имэрэу Геннадий Митрофановыр.

АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэ къызэритыгъэмкIэ, илъэси 7-м фэтэрыбэу зэхэт унэхэм ящагу 228-рэ, общественнэ чIыпIэ 21-рэ Мыекъуапэ щызэтырагъэпсыхьагъ. Сомэ миллион 907,3-рэ ахэм апэIухьагъ, ащ щыщэу сомэ миллион 655,1-р федеральнэ бюджетым къыхагъэкIыгъ. Мы илъэсым Мыекъуапэ ищагухэмрэ иобщественнэ чIыпIэхэмрэ язэтегъэпсыхьан сомэ миллиони 146,4-рэ пэIуагъэхьагъ. АщкIэ фэтэрыбэу зэхэт унэхэм ящагу 21-рэ агъэцэкIэжьыгъ.

Урамэу Пионерскэм тет унэу N 416-м, урамэу Школьнэм — унэу N 166-м, Патрис Лумумбэ ыцIэ зыхьырэ урамым тет унэхэу NN 111-м, 113-м, урамэу 12 Марта тет унэу N 140-м, Чкаловым иурамкIэ унэу N 72-м, Юннатхэм яурам тет унэхэу N N 8-мрэ 10-мрэ ящагухэм IофшIэнэу ащагъэцэкIагъэхэм КъумпIыл Мурат уасэ къафишIыгъ.

Щагухэм язэтегъэпсыхьанкIэ, куандэхэр, чъыгхэр ахэм ащыгъэтIысхьэгъэнхэмкIэ, лъэныкъо пстэури къыдэлъытэгъэн зэрэфаемкIэ щыкIэгъэ заулэ АР-м и ЛIышъхьэ афилъэгъугъ. АщкIэ къулыкъухэр, организациехэр, муниципалитетыр, фэтэрыбэу зэхэт унэхэм ачIэсхэр зэрэзэдеIэжьынхэ фаер ащ къыхигъэщыгъ.

Республикэм и ЛIышъхьэ АР-м псэолъэшIынымкIэ, транспортымкIэ, псэупIэ-коммунальнэ, гъогу хъызмэтымкIэ и Министерствэрэ Мыекъуапэ имэриерэ пшъэрылъ афишIыгъ зыми имые псэолъэжъхэр, унэе гъучI гаражхэр щагухэм адэхыжьыгъэнхэмкIэ предложениехэр къагъэхьазырынхэу.

«Теплъэ дахэ яIэу, гуIэтыпIэхэу, джырэ шапхъэхэм адиштэу щагухэр зэтегъэпсыхьэгъэнхэм, лъэныкъо пстэури къыдэлъытэгъэным шъунаIэ атежъугъэт. ЦIыфхэм зэрашIоигъом тетэу шъузекIу, ахэр зыгъэохъурэ псэолъэжъхэр Iушъухыжьых. ЦIыфхэм юридическэ IэпыIэгъу яжъугъэгъот, джащ фэдэу псэолъэжъхэм яIухыжьынкIи ящыкIэгъэ техникэр аIэкIэжъугъахь. Тэ зы гухэлъ тиIэр, тызэгъусэу ар зэдэдгъэцэкIэн фае», — къыIуагъ АР-м и ЛIышъхьэ.

КъумпIыл Мурат Мыекъуапэ иадминистрацие пшъэрылъ фишIыгъ щагухэм язэтегъэпсыхьанкIэ шIыкIакIэхэр къыгъотынэу, мыщкIэ къэлэшхохэм опытэу яIэр зэригъэшIэнэу, архитектурэ гъэпсыкIэ анахь пэрытхэр къызфигъэфедэнхэу.