ЕджэпIитIу Адыгеим къыщызэIуахыгъ

Нэбгырэ 1100-рэ зырызмэ ателъытэгъэ еджэпIитIу шIэныгъэм и Мафэ Адыгеим къыщызэIуахыгъ.

Ахэр къызыдэтэджэгъэ псэупIэхэу Яблоновскэмрэ АдыгеякIэмрэ непэ лъэшэу заушъомбгъу, ащыпсэухэрэм япчъагъэ хэпшIыкIэу хэхъо. Республикэм ихэбзэ къулыкъухэм социальнэ инфраструктурэм изегъэушъомбгъун епхыгъэ Iофыгъохэр зэрэзэшIуахыхэрэм къыкIэкIуагъэу плъытэмэ хъущт лъэпкъ проектэу «Гъэсэныгъэм» ифедеральнэ проектэу «Джырэ шапхъэхэм адиштэрэ еджапIэр» зыфиIорэм тетэу еджэпIакIэхэр къызэрэзэIуахыхэрэр.

Адыгеим и ЛIышъхьэу КъумпIыл Мурат мэфэкI шIыкIэм тетэу псэупIэу Яблоновскэм къыщызэIуахыгъэ еджапIэу N 28-м тыгъуасэ щыIагъ. МэфэкIитIумкIэ – еджапIэр къызэрэзэIуахыгъэмкIэ ыкIи шIэныгъэм и МафэкIэ кIэлэегъаджэхэми, еджакIохэми, ахэм янэ-ятэхэми ар къафэгушIуагъ.

Iофтхьабзэм хэлэжьагъэх АР-м ифедеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэ игуадзэу, АР-м финансхэмкIэ иминистрэу Виктор Орловыр, АР-м гъэсэныгъэмрэ шIэныгъэмрэкIэ иминистрэу Евгений Лебедевыр, муниципальнэ образованиеу «Тэхъутэмыкъое районым» ипащэу Шъэо Аскэр, АР-м иминистрэхэм я Кабинет хэтхэр, муниципалитетым ипащэхэр, районым идепутатхэр, общественностыр.

«ШIэныгъэм и МафэкIэ сышъуфэгушIо! КIэлэегъаджэхэмкIи, еджакIохэмкIи, анахьэу апэрэ лъэбэкъур непэ еджапIэм чIэзыдзэщтхэмкIи, ахэм янэ-ятэхэмкIи ар мэфэкIышхоу щыт. Ахэр шIэныгъэм идунай хьалэмэт хэщагъэ хъущтых, хъугъэ-шIэгъэ гъэшIэгъоныбэ, текIоныгъакIэхэр къапыщылъых. Непэ лъэшэу тызыгъэгушIорэр нэбгырэ 1100-мэ ателъытэгъэ еджэпIитIу а зы мафэм къызэрэзэдызэIуахырэр ары. ШIэныгъэ куу еджакIохэм зэрагъэгъотынымкIэ, кIэлэегъаджэхэм икъоу Iоф ашIэнымкIэ джырэ шапхъэхэм адиштэрэ амал пстэури яI. ЕджэпIакIэхэм кIэлэеджакIо пэпчъ икъоу анаIэ зэращытырагъэтыщтым сицыхьэ телъ», — къыIуагъ КъумпIыл Мурат.

АР-м и ЛIышъхьэ кIэлэеджакIохэм шIухьафтынхэр аритыгъэх. Апэрэ классхэм арыхьэгъэ пстэуми канцеляр пкъыгъохэр зыдэлъ Iалъмэкъхэр афагъэшъошагъэх. Шъугу къэтэгъэкIыжьы «Апэрэ классым ихьагъэм пае шIухьафтын» зыфиIорэ Iофтхьабзэм диштэу Iалъмэкъ мини 6,7-рэ Адыгеим зэрэщагъэхьазырыгъэр, республикэм иеджапIэхэм яапэрэ классхэм арыхьагъэхэм ахэр зэраратыгъэхэр. Мы аужырэ илъэситIум ащ фэдэ шIухьафтынхэр тиреспубликэ Херсон хэкумкIэ Геническэ районым иеджапIэхэм яапэрэ классхэм арыхьагъэхэми ареты. Iофтхьабзэм изехьанкIэ мыгъэ IэпыIэгъу къафэхъугъ пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Картонтарэмрэ» компаниеу «SFT Group» зыфиIорэмрэ.

КъумпIыл Мурат Яблоновскэм къыщызэIуахыгъэ гурыт еджапIэм икIэлэегъаджэхэмрэ иеджакIохэмрэ адэгущыIагъ. Лъэш дэдэу зыфэныкъощтыгъэхэ еджэпIакIэр зэрафагъэпсыгъэмкIэ республикэм ипащэ зэрэфэразэхэр ахэм къаIуагъ. Корпус заулэу зэхэт еджапIэм икабинетхэм ящыкIэгъэ оборудованиер зэкIэ арыт, дэгъоу зэтегъэпсыхьагъэх, Интернетыр къызфагъэфедэнэу амал яI. Джащ фэдэу еджапIэм хэтых мастерскойхэр, спорт, актовэ залхэр, тхылъеджапIэр, шхапIэр, медпунктыр, нэмыкI псэуалъэхэр. Спорт джэгупIэхэри, щагури дэгъоу зэтегъэпсыхьагъэх.

Къуаджэу АдыгеякIэм къыщызэIуахыгъэ еджэпIакIэри джырэ шапхъэхэм адиштэу зэтегъэпсыхьагъ. АР-м иминистрэхэм я Кабинет и Тхьаматэу КIэрэщэ Анзаур ащ щыIагъ, АР-м и ЛIышъхьэ ыцIэкIэ шIэныгъэм и МафэкIи, еджапIэр къызэрэзэIуахыгъэмкIи къафэгушIуагъ.