Предприятие пэрытым иIофшIакIэ зыщигъэгъозагъ

Адыгеим и ЛIышъхьэу КъумпIыл Мурат республикэм иагропромышленнэ комплекс ипредприятие пэрытхэм ащыщэу фирмэу «Комплекс Агро» иIофшIэн зэрэзэхищэрэм зыщигъэгъозагъ. Ащ игъусагъэх АР-м ифедеральнэ инспектор шъхьаIэу Сергей Дрокинымрэ АР-м мэкъу-мэщымкIэ иминистрэу Къуанэ Анзауррэ.

ПшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Комплекс Агро» зыфиIорэм ипащэу Александр Денисовым цеххэм Iоф зэрашIэрэр, инвестициехэр къазэрахалъхьэрэр къафиIотагъ. Илъэс 26-м ехъугъэу компанием пхъэшъхьэ-мышъхьэпсхэр, хэтэрыкIыпсхэр, сабыйхэм атегъэпсыхьэгъэ шхыныгъохэр, хэтэрыкIхэм ахэшIыкIыгъэ шIоIу зэфэшъхьафхэр къыщыдагъэкIых. Сатыу маркэхэу «Бабушкино лукошко», «Фрумка», «RICH», «Тема» ыкIи нэмыкIхэр зытет товар лъэпкъ 57-рэ ащ къыдегъэкIы. Компанием ипродукцие тихэгъэгу ишъолъыр зэфэшъхьафхэми, IэкIыб къэралыгъохэми аIэкIегъахьэ.

Къэралыгъо IэпыIэгъу къазэраратырэ программэм зэрэхэлажьэрэм ишIуагъэкIэ предприятием къыщыдагъэкIырэ продукциер нахьыбэ мэхъу зэпыт. 2023-рэ илъэсым сомэ миллиард 1,7-м ехъу зыосэ товархэр ащ IуигъэкIыгъэх. 2022-рэ илъэсым егъэпшагъэмэ, сомэ миллион 718-кIэ ар нахьыб.

Урысыем мэкъу-мэщымкIэ и Министерствэ ипрограммэ диштэу фэгъэкIотэныгъэ зиIэ чIыфэу къыратыгъэхэмкIэ мы аужырэ илъэсищым пюрер къызыщыдагъэкIырэ линиитIурэ продукциер зыщызэкIоцIащыхьэрэ линиерэ фирмэм къызIэкIигъэхьагъэх. Пюрер къыдэзыгъэкIырэ оборудованием сомэ миллион 270-м ехъу тефагъ. Ащ нэмыкIэу компанием ежь иахъщэкIэ прессыр, пхъэшъхьэ-мышъхьэпсхэр изыгъэхъорэ аппаратыр къыщэфыгъэх, маркировкэмкIэ системэу «Честный знак» зыфиIорэм техьагъэх. Мы илъэсым предприятием сомэ миллиони 115-рэ хъурэ инвестициехэр къыхалъхьагъэх. IофшIэпIэ чIыпIакIэу 20-м ехъу зэхащагъ. ПстэумкIи заводым нэбгырэ 300-м ехъумэ Iоф щашIэ.

«Фирмэу «Комплекс Агро» республикэм игъомылэпхъэшI предприятие пэрытхэм зэу ащыщ. Илъэс 26-м ехъугъ экологическэу къэбзэ продукциеу хэгъэгуми, IэкIыб къэралыгъохэми дэгъоу ащыIукIырэр компанием къызыдигъэкIырэр. Санкциехэм ямылъытыгъэу джырэ шапхъэхэм адиштэу предприятиер зэтырагъэпсыхьэ, продукциеу ащ къыдигъэкIырэм хэхъо зэпыт, IофшIэпIэ чIыпIакIэхэр зэхещэх. Къэралыгъо IэпыIэгъумкIэ амалэу щыIэхэр къызфэдгъэфедэзэ, бизнесым тишIуагъэ едгъэкIыным тэ сыдигъуи тыфэхьазыр. Хэгъэгум гъомылапхъэхэр фикъунымкIи, республикэм иэкономикэ зыкъегъэIэтыгъэнымкIи, компанием иIофышIэхэу лэжьэпкIэ дэгъу къызэратыхэрэмкIи ащ мэхьанэшхо иI», — къыIуагъ КъумпIыл Мурат.