Мыекъуапэ нахь лъэгъупхъэ хъущт

Министрэхэм я Кабинет изэхэсыгъо зекIонымкIэ Мыекъуапэ код иIэным тегъэпсыхьэгъэ проектыр къыхалъхьагъ. Къалэм игупчэу тарихъ мэхьанэ зиIэ псэуалъэхэр зэрытым, зекIонымкIэ экскурсиехэр зыщызэхащэрэм зэхъокIыныгъэхэр фашIыщтых.

ГущыIэм пае, Пушкиным иурам гимназиеу № 5-м пэблагъэу, тхакIоу Евгений Шварц иаллее щагъэпсыщт. ТхакIом щыIэныгъэ гъогоу къыкIугъэр къизыIотыкIырэ пхъэмбгъур, арт-псэуалъэхэр, итхыгъэхэм къахэфэрэ геройхэм яскульптурэхэр ащ тетыщтых.

Культурэм и Унэу «Гигантым» дэжь урам тхылъеджапIэ къыщызэIуахыщт. Къэлэ паркым идэхьэгъу дэжь республикэм икартэ итеплъэ зиIэщт арт-псэуалъэ щагъэпсыщт. Мышъэ фыжьхэм яскульптурэхэр зыхэт фонтаныр зыпкъ рагъэуцожьыщт.

Джащ фэдэу лъэсрыкIо лъагъохэм адыгэ тхыпхъэхэр зытетыщт, адыгэ гущыIэжъхэр адыгабзэкIи урысыбзэкIи зытетхэгъэщт арт-псэуалъэхэр ащагъэпсыщтых, къалэм игупчэ ит унэ заулэмэ сурэтышIэу Бырсыр Абдулахь исурэтхэм ащыщхэр атырашIыхьащтых.

«Республикэм икъэлэ шъхьаIэ зекIохэм агу рихьырэ чIыпIэхэм ащыщ хъугъэ. Мы аужырэ илъэсхэм къалэм ижъыкIэ теплъэу иIагъэр зэтегъэуцожьыгъэнымкIэ, къэлэгъэпсынымрэ архитектурэмрэ ясаугъэтхэм якъэухъумэнкIэ бэ тшIагъэр. Тикъалэ итеплъэ нахь дахэ хъу, цIыфхэм ар агу къинэжьы тшIоигъу. ЗекIонымкIэ код тиIэныр лъэбэкъушIоу щыт. ЫужыкIэ опытэу тиIэр район гупчэхэми къащызфагъэфедэн алъэкIыщт», — къыIуагъ КъумпIыл Мурат.

Зэхэсыгъом хэлэжьагъэхэм Мыекъуапэ ипчэгу шъхьаIэу Лениным ыцIэ зыхьырэр зэрагъэкIэжьыщт проектми нэIуасэ зыфашIыгъ. Мыщ плиткэхэр щызэблахъунхэу, фонтаныкIэ, пхъэнтIэкIухэр, остыгъакIэхэр, сатыушIыпIэхэр, хъэренэхэр, арт-псэуалъэхэр щагъэуцунхэу рахъухьэ. Шъугу къэтэгъэкIыжьы В. И. Лениным ыцIэ зыхьырэ пчэгур лъэпкъ проектэу «ПсэупIэмрэ къэлэ щыIакIэмрэ» зыфиIорэм диштэу 2025-рэ илъэсым зэтырагъэпсыхьанэу щыт общественнэ чIыпIэхэм зэрахалъытагъэр.