ЗэдэгущыIэгъум хэлэжьагъэх хэбзэухъумэкIо къулыкъухэм япащэхэри

КъумпIыл Мурат архиепископым, Адыгеим щыпсэурэ чыристан пстэуми афэгушIуагъ а хъугъэ-шIагъэм ехъулIэу. ЛIышъхьэм къызэрэхигъэщыгъэмкIэ, обществэм ихэхъоныгъэкIэ епархием пшъэрылъышхо зэшIуехы. А илъэсхэм къакIоцI республикэм зыкIыныгъэмрэ зэгурыIоныгъэмрэ щыгъэпытэгъэнхэмкIэ, цIыф лъэпкъ зэфэшъхьафхэм къахэкIыгъэхэм ыкIи дин зэмылIэужыгъохэр зылэжьыхэрэм зэзэгъыныгъэ ахэлъэу Iофыгъоу къэуцухэрэр зэшIуахынхэмкIэ бэ ыгъэцэкIагъэр. Джащ фэдэу цIыфыгъэ шэпхъэ дахэхэм арыгъуазэхэзэ ныбжьыкIэхэр шIум, зэдэIэпыIэжьыныгъэм, я Хэгъэгу фэшъыпкъэнхэм ягъогу тещэгъэ­н­­хэм епархием иIахьышхо зэрэхишIыхьагъэр республикэм и ЛIышъхьэ къыхигъэщыгъ.

«Непэ, Урысыем щыпсэурэ цIыфхэмкIэ лъэхъэнэ гумэкIыгъом, диныр гушъхьэлэжьныгъэм­кIэ кIэгъэкъон пытэу бэмэ афэхъу, къиныгъохэм апэуцужьынхэмкIи, гъэпсын IофшIэныр лъыгъэкIотэгъэнымкIи ащ ишIуагъэ къэкIо. ЦIыфхэм шIошъ­хъуныгъэ агу илъынымкIэ, диныр зылэжьыхэрэм ащ къыпкъырыкIырэ фэныкъоныгъэхэр ягъэгъотыгъэнхэмкIэ епархием бэ зэшIуихырэр. Ащ фэдэ гу­хэлъышIухэм тэри адетэгъаштэ. Хабзэм, православнэ чылысым, бизнесым акIуачIэ зэхэлъэу чылысхэр агъэкIэжьых, кIэхэр ашIых, джащ фэдэу культурэм исаугъэтхэри зыпкъ рагъэуцожьых», — къыIуагъ АР-м и ЛIышъхьэ.

Республикэм гушъхьэлэжьныгъэр щыгъэпытэгъэнымкIэ лъэныкъо пстэуми зэдэлэжьэныгъэ пытэ ыкIи зэгурыIоныгъэ зэдыряIэн зэрэфаер, ащ тегъэ­псыхьагъэу Iофыгъоу къэуцухэрэр зэрэзэшIуахыхэрэр ЛIышъхьэм къыхигъэщыгъ: илъэс къэс Iофтхьэбзэ пшIы пчъагъэхэр зэшIуахых, ахэм православнэ культурэм хэхъоныгъэ фашIы, лъэпсэ куухэр зиIэ шIуагъэхэу Адыгеимрэ Урысыемрэ ащыпсэурэ цIыф лъэпкъ пстэуми зэдыряеу щытхэр агъэпытэх.

«Социальнэ ыкIи политикэ Iофыгъоу къэуцухэрэм язэшIохын епархиер чанэу зэрэхэлажьэрэр тигуапэ. Илъэсэу икIыгъэм Дунэе урыс лъэпкъ чылысым ишъолъыр къутамэ Адыгеим зэрэщызэхащагъэм ар къеушыхьаты. Ащ хэхьагъэх республикэм илъэпкъ общественнэ организациехэм ыкIи иконфессиехэм ялIыкIохэр. ЗэкIэми ткIуачIэ зэрэзэдетхьылIэрэм ишIуагъэкIэ экстремизмэмрэ лъэпкъ зэпэуцужьыныгъэмрэ республикэм илъхэп», — къыIуагъ Адыгеим и ЛIышъхьэ.

Православнэ чылысхэм яIофышIэхэм, чыристан диныр зылэжьхэрэм тидзэ къулыкъушIэхэм IэпыIэгъу зэрафэхъухэ­рэм апае зэрафэразэр КъумпIыл Мурат къыхигъэщыгъ. Ащ къызэриIуагъэмкIэ, шIушIэ ыкIи общественнэ IофшIэным епархиер цыхьэшIэгъу кIэгъэкъонэу иIагъ ыкIи непи иI.

«ТихэгъэгукIэ анахь пшъэдэкIыжь ин зыщытхьырэ лъэхъаным цIыфыгъэ ыкIи социальнэ пшъэдэкIыжьышхо зэрэшъу­хьырэр шъори къэшъогъэлъагъо. Дин объединениехэм яIофшIэн шIуагъэ хэлъэу зэхэщэгъэным пае Адыгеим тапэкIи ищыкIагъэр зэкIэ ышIэщт», — къыIуагъ республикэм и ЛIышъхьэ.

Адыгеим ыкIи Мыекъопэ епархием иархиепископэу Тихон къызэгущыIэм республикэм и ЛIышъхьэ лъэныкъуабэхэмкIэ ишIуагъэ къызэраригъэкIырэм пае зэрэфэразэр къыIуагъ. Мыщ дэжьым къыхигъэщыгъ къалэу Мыекъуапэ щагъэ­псырэ Свято-Успенскэ кафедральнэ чылысым епхыгъэ IофшIэнхэр зэрэкIохэрэр. Республикэм ихэбзэ къу­лыкъухэм яIэпыIэгъу хэлъэу IофшIэнхэр лъэкIуатэх.

КъумпIыл Мурат къызэрэхигъэщы­гъэмкIэ, чылысым ишIынкIэ IэпыIэгъоу аратырэр лъагъэкIотэщт.