КIымафэр щынэгъончъэнэу

ПсэупIэ-коммунальнэ хъыз­мэтым иIофыгъохэмкIэ зэхэсыгъоу тыгъуасэ щыIагъэм Адыгеим и ЛIышъхьэу КъумпIыл Мурат чIыпIэхэм япащэхэмрэ къулыкъухэм яIэшъхьэтетхэмрэ пшъэрылъ афи­шIыгъ зэпыу имыIэу коммунальнэ къулыкъухэм зэкIэми кIымэфэ лъэхъаным Iоф ашIэнэу, муниципальнэ псэупIэхэм зэкIэми фэIо-фашIэхэр игъом ыкIи дэгъоу ащагъэцэкIэнхэу.

«Гъогухэр, лъэсрыкIуапIэхэр, кэнау­хэр, щагу кIоцIхэр лъэтемытэу, осыр къызэресыгъэм лъыпытэу гъэкъэбзэгъэнхэ, Iумылыри техыгъэн фае», — къыкIигъэтхъыгъ ЛIышъхьэм.

Ащ къызэриIуагъэмкIэ, мы Iофыгъо­хэм язэшIохын зэлъытыгъэр чIыпIэхэм ащыпсэухэрэм зэпхыныгъэу адыряIэр ыкIи фэтэрыбэ хъурэ унэхэм ачIэсхэр ахэм ягъэIорышIэн зэрэхэщагъэхэр ары.

«ЦIыфхэм анэгъэсыгъэн фае къулыкъухэмрэ псэупIэ-коммунальнэ хъыз­мэтшIапIэхэмрэ нахьышIоу Iоф зэрашIэщтыр ежьхэм ацIэкIэ квартальнэ уполномоченнэхэмрэ фэтэрыбэу зэхэт унэхэм яшIоигъоныгъэхэр къащызыгъэлъагъо­хэ­рэмрэ ягъэIорышIэкIо компаниехэм зэпхыныгъэ ренэу адыряIэ хъумэ. Мы IофшIэныр лъэныкъуабэ къызэдэзыубытэу, муниципальнэ псэупIэхэм япащэхэри хэгъэщагъэхэу щытын фае, ахэр ары пстэури зыгъэ­IорышIэнэу щытыр», — къы­Iуагъ КъумпIыл Мурат.